ഇറാനിയൻ ‘ഷാഹെദ്’ മാതൃക; 1000 കിലോമീറ്റർ പരിധി,ശത്രുക്കളെ തകർത്തെറിയാൻ ഇനി ‘അന്തകൻ’ ആകാശത്ത്!

ഇന്ത്യയുടെ തദ്ദേശീയ ആക്രമണ ശേഷിക്ക് വലിയ കരുത്തുപകർന്ന് പുതിയൊരു നാഴികക്കല്ല്. രാജസ്ഥാനിലെ ജെയ്‌സാൽമീറിലുള്ള പൊഖ്‌റാൻ ഫീൽഡ് ഫയറിങ് റേഞ്ചിൽ ഞായറാഴ്ച നടന്ന പരീക്ഷണത്തിൽ, 1,000 കിലോമീറ്റർ ദൂരപരിധിയുള്ള ‘കെഎഎൽ’ (KAL) എന്ന വൺ വേ അറ്റാക്ക് ഡ്രോൺ വിജയകരമായി പറന്നുയർന്നു. നോയിഡ ആസ്ഥാനമായുള്ള പ്രതിരോധ സാങ്കേതിക കമ്പനിയായ ഐജി ഡിഫൻസ് ആണ് ഈ അത്യാധുനിക ഡ്രോൺ രൂപകൽപ്പന ചെയ്ത് വികസിപ്പിച്ചെടുത്തിരിക്കുന്നത്. ഒരു വാഹനത്തിൽ ഘടിപ്പിച്ച ലോഞ്ച് പ്ലാറ്റ്‌ഫോമിൽ നിന്നാണ് ഡ്രോൺ വിജയകരമായി പരീക്ഷിച്ചത്. ‘കെഎഎൽ’ (KAL) ഡ്രോണിന്റെ പ്രധാന സവിശേഷതകൾ: ∙ദൂരപരിധി (Range): 1,000 കിലോമീറ്റർ വരെ ലക്ഷ്യത്തിലേക്ക് സഞ്ചരിക്കാൻ ശേഷി. ∙സഞ്ചാരസമയം (Endurance): 7 മുതൽ 8 മണിക്കൂർ വരെ തുടർച്ചയായി ആകാശത്ത് തങ്ങിനിൽക്കാൻ സാധിക്കും. ∙പേലോഡ് ശേഷി (Payload Capacity): 50 കിലോഗ്രാം വരെ സ്ഫോടകവസ്തുക്കളോ മറ്റ് ഉപകരണങ്ങളോ വഹിക്കാൻ കഴിയും. ∙പ്രവർത്തന ഉയരം (Operating Altitude): സമുദ്രനിരപ്പിൽ നിന്ന് 5,000 മീറ്റർ ഉയരം വരെ പ്രവർത്തിക്കാനാകും. ലോങ്-റേഞ്ച് കാമികാസേ വിഭാഗത്തിൽ പെടുന്നതാണ് ഈ ഡ്രോൺ. അതായത്, നിശ്ചിത ലക്ഷ്യത്തിലേക്ക് ഒറ്റത്തവണ മാത്രം ചെന്ന് ഇടിച്ചുകയറി സ്ഫോടനം നടത്തുന്ന ഒളിപ്പോരാളി പ്ലാറ്റ്‌ഫോമാണിത്. എന്താണ് ‘പ്രോജക്റ്റ് കെഎഎൽ’? ഇറാനിയൻ നിർമിത ‘ഷാഹെദ്’ (Shahed-class) ഡ്രോണുകളിൽ നിന്ന് പ്രചോദനം ഉൾക്കൊണ്ടാണ് IG Defence ‘പ്രോജക്റ്റ് കെഎഎൽ’ യാഥാർത്ഥ്യമാക്കുന്നത്. കുറഞ്ഞ ചെലവിൽ വലിയ ദൂരത്തേക്ക് സ്ഫോടകവസ്തുക്കൾ എത്തിക്കാനുള്ള ഈ തന്ത്രപരമായ ശേഷി വലിയ ശ്രദ്ധ നേടിയിട്ടുണ്ട്. യുഎസിന്റെയും സഖ്യകക്ഷികളുടെയും താവളങ്ങളെ വെല്ലുവിളിക്കാൻ ഇറാൻ ഉപയോഗിക്കുന്ന ഇത്തരം ഡ്രോണുകൾക്ക് പകരമായി, ഇന്ത്യയുടെ സ്വന്തം മണ്ണിൽ നിർമ്മിച്ച ശക്തമായൊരു ആയുധമായാണ് ഇത് വിഭാവനം ചെയ്തിരിക്കുന്നത്. ശത്രുക്കളുടെ വ്യോമപ്രതിരോധ സംവിധാനങ്ങളെ കബളിപ്പിച്ച് ദൂരെ ലക്ഷ്യസ്ഥാനങ്ങളിലേക്ക് ആഴത്തിൽ തുളച്ചുകയറാനും, ആവശ്യാനുസരണം ലക്ഷ്യങ്ങൾ നിരീക്ഷിച്ച് ഏറ്റവും കൃത്യമായ നിമിഷത്തിൽ ആക്രമണം നടത്താനും ‘കെഎഎൽ’ ഡ്രോണുകൾക്ക് സാധിക്കും. പ്രോജക്റ്റ് പൂർണ്ണതോതിലേക്ക് എത്തുന്നതോടെ ഇന്ത്യയുടെ പ്രതിരോധ രംഗത്ത് ഇതൊരു വലിയ വിപ്ലവമായി മാറും.