കുസാറ്റ് അംഗീകൃത ഏവിയേഷൻ കോഴ്‌സുകൾക്ക് സി.ഐ.എ.എസ്.എൽ അക്കാദമി അപേക്ഷ ക്ഷണിച്ചു

​കൊച്ചി: സിയാലിന്റെ അനുബന്ധ സ്ഥാപനമായ സി.ഐ.എ.എസ്.എൽ അക്കാദമി പുതിയ അധ്യയന വർഷത്തെ വിവിധ ഏവിയേഷൻ കോഴ്‌സുകളിലേക്ക് പ്രവേശനം ആരംഭിച്ചു. ഒരു വർഷം ദൈർഘ്യമുള്ള കുസാറ്റ് അംഗീകൃത പി.ജി ഡിപ്ലോമ, അഡ്വാൻസ്ഡ് ഡിപ്ലോമ കോഴ്‌സുകൾക്കും ആറുമാസം ദൈർഘ്യമുള്ള സർട്ടിഫിക്കറ്റ് കോഴ്‌സുകൾക്കുമാണ് അപേക്ഷ ക്ഷണിച്ചിരിക്കുന്നത്. സിയാൽ എയ്‌റോ പാർക്കിലെ അക്കാദമി ക്യാംപസിലാണ് ക്ലാസുകൾ നടക്കുക. ബിരുദധാരികൾക്കായി ഒരുക്കിയിരിക്കുന്ന പി.ജി ഡിപ്ലോമ ഇൻ ഏവിയേഷൻ മാനേജ്‌മെന്റിൽ എയർലൈൻ-എയർപോർട്ട് മാനേജ്‌മെന്റ്, കാർഗോ, സെക്യൂരിറ്റി തുടങ്ങിയ മേഖലകളിൽ വിപുലമായ പരിശീലനം ലഭിക്കും.

കെടെറ്റ് കൈപ്പിടിയിലാക്കാം; അറിഞ്ഞിരിക്കേണ്ട അടിസ്ഥാന വിവരങ്ങളും ടിപ്സും

Career Guru

കൂടാതെ വിമാനത്താവളങ്ങളിലെ ഗ്രൗണ്ട് സർവീസ്, റാംപ് പ്രവർത്തനങ്ങൾ എന്നിവ ലക്ഷ്യമിടുന്ന ബിരുദധാരികൾക്കായി സർട്ടിഫിക്കറ്റ് ഇൻ എയർപോർട്ട് പാസഞ്ചർ സർവീസസ് മാനേജ്‌മെന്റ്, സർട്ടിഫിക്കറ്റ് ഇൻ എയർപോർട്ട് റാംപ് സർവീസസ് മാനേജ്‌മെന്റ് എന്നീ ആറുമാസത്തെ കോഴ്‌സുകളും ലഭ്യമാണ്. ​അഗ്നിശമന-രക്ഷാപ്രവർത്തന മേഖലയിൽ കരിയർ ആഗ്രഹിക്കുന്ന സയൻസ് പശ്ചാത്തലമുള്ള പ്ലസ്ടു വിദ്യാർത്ഥികൾക്ക് അഡ്വാൻസ്ഡ് ഡിപ്ലോമ ഇൻ എയർക്രാഫ്റ്റ് റെസ്‌ക്യൂ ആൻഡ് ഫയർ ഫൈറ്റിംഗ് കോഴ്‌സ് തിരഞ്ഞെടുക്കാം. 800 ചതുരശ്ര അടിയിൽ മെയ്‌സ് മാതൃകയിൽ നിർമിച്ച ഇന്ത്യയിലെ തന്നെ ഏറ്റവും വലിയ ഏവിയേഷൻ ബ്രീത്തിംഗ് അപ്പാരറ്റസ് ട്രെയിനിങ് ഗാലറിയിലാണ് ഈ കോഴ്‌സിലെ പ്രായോഗിക പരിശീലനം നൽകുന്നത്. പുകയും ഇരുട്ടും നിറഞ്ഞ അതീവ ദുഷ്കരമായ സാഹചര്യങ്ങൾ കൃത്രിമമായി സൃഷ്ടിച്ച് നൽകുന്ന പരിശീലനം ഇടുങ്ങിയതും കാഴ്ചാപരിധി കുറഞ്ഞതുമായ സ്ഥലങ്ങളിൽ രക്ഷാപ്രവർത്തനം നടത്താൻ വിദ്യാർഥികളെ പ്രാപ്തരാക്കും.

നാലുവർഷ ബിരുദം; ഇന്റേൺഷിപ്പിന് നിർബന്ധിത ഫീസെന്ന് പരാതി

Education News

ഇൻസ്ട്രക്ടർക്ക് മോണിറ്ററിങ് റൂമിലിരുന്ന് സിസിടിവി വഴി ഓരോ ചലനങ്ങളും തത്സമയം നിരീക്ഷിക്കാനും വിലയിരുത്താനും കഴിയുമെന്നതിലൂടെ പരിശീലനത്തിന്റെ ഗുണനിലവാരം ഉറപ്പാക്കാൻ കഴിയുമെന്നതും ഇവിടുത്തെ പ്രത്യേകതയാണ്. രാജ്യാന്തര നിലവാരമുള്ള ഇത്തരം സംവിധാനങ്ങൾ വഴി ലഭിക്കുന്ന പ്രായോഗിക അറിവ് വിദ്യാർഥികൾക്ക് ആത്മവിശ്വാസത്തോടെ തൊഴിൽ മേഖലയിലേക്ക് പ്രവേശിക്കാൻ സഹായകരമാകും. പഠനത്തിന്റെ ഭാഗമായി ബ്രീത്തിങ് അപ്പാരറ്റസ്, സ്മോക്ക് ചേംബർ, പ്രഷർ ഫെഡ് ഫയർ ഫൈറ്റിംഗ് തുടങ്ങിയ മേഖലകളിൽ നൽകുന്ന പ്രത്യേക സർട്ടിഫിക്കേഷനുകൾ തൊഴിൽ വിപണിയിൽ ഉദ്യോഗാർഥികളുടെ ഡിമാൻഡ് വർദ്ധിപ്പിക്കും. ​കൊച്ചി ശാസ്ത്ര സാങ്കേതിക സർവകലാശാല അംഗീകാരത്തോടെ ഏവിയേഷൻ കോഴ്‌സുകൾ നടത്തുന്ന കേരളത്തിലെ ഏക സ്ഥാപനമാണ് സി.ഐ.എ.എസ്.എൽ അക്കാദമി.

കളിക്കാൻ അറിയണമെന്നില്ല; സ്‌റ്റൈപൻഡോടെ ഇന്റേൺഷിപ്പുകളുമായി കേന്ദ്ര കായിക മന്ത്രാലയം

Career Guru

കുസാറ്റ് നേരിട്ട് നിയന്ത്രിക്കുന്ന പാഠ്യപദ്ധതിയും പരീക്ഷാ നടത്തിപ്പും സർവകലാശാല നൽകുന്ന സർട്ടിഫിക്കറ്റുമാണ് ഈ കോഴ്സുകളുടെ ആകർഷണം. പ്രവേശന പരീക്ഷയുടെയും അഭിമുഖത്തിന്റെയും അടിസ്ഥാനത്തിലായിരിക്കും തിരഞ്ഞെടുപ്പ്. അഗ്നിശമന വിഭാഗത്തിലേക്കുള്ള പ്രവേശനത്തിന് കായികക്ഷമതാ പരിശോധന കൂടി ഉണ്ടായിരിക്കും. അവസാന വർഷ പരീക്ഷാഫലം കാത്തിരിക്കുന്ന വിദ്യാർത്ഥികൾക്കും അപേക്ഷിക്കാം. താല്പര്യമുള്ള ഉദ്യോഗാർത്ഥികൾക്ക് https://academy.ciasl.aero/ എന്ന ലിങ്ക് വഴി റജിസ്റ്റർ ചെയ്യണം. കൂടുതൽ വിവരങ്ങൾക്ക്: 8848000901, 0484-2611785, ഇമെയിൽ: academy@ciasl.in

ADVERTISEMENT