By admin 
ടെക് ലോകം കാത്തിരുന്ന ആപ്പിളിന്റെ ഈ വർഷത്തെ ഏറ്റവും വലിയ ഇവന്റിന് ഇനി മണിക്കൂറുകൾ മാത്രം. “Awe Dropping” എന്ന് പേരിട്ടിരിക്കുന്ന പരിപാടിയിൽ, ഏറെ ആകാംഷയോടെ കാത്തിരിക്കുന്ന ഐഫോൺ 17 സീരീസും, പുതിയ ആപ്പിൾ വാച്ച് സീരീസും അനാച്ഛാദനം ചെയ്യും. രൂപകൽപ്പനയിലെ സമൂലമായ മാറ്റങ്ങളും, ക്യാമറയിലെ പുരോഗതിയും, പുത്തൻ AI ഫീച്ചറുകളും ഉൾപ്പെടെ നിരവധി കാര്യങ്ങളാണ് ഉപഭോക്താക്കൾ പ്രതീക്ഷിക്കുന്നത്.
ഐഫോൺ 17: ഡിസൈൻ മാറ്റങ്ങൾ, എഐ ഫീച്ചറുകൾ
ഐഫോൺ സീരീസിൽ നാല് മോഡലുകളായിരിക്കും ഉണ്ടാവുകയെന്നാണ് സൂചന. ഐഫോൺ 17,ഐഫോൺ 17 എയർ, ഐഫോൺ 17 പ്രോ, ഐഫോൺ 17 പ്രോ മാക്സ് എന്നിവയാണവ. ഇതിൽ Pro മോഡലുകളുടെ രൂപകൽപ്പനയിൽ വലിയ മാറ്റങ്ങൾ പ്രതീക്ഷിക്കുന്നു.
ഏറ്റവും പ്രധാനപ്പെട്ട ആകർഷണം, സൂപ്പർ-തിൻ ഷാസിയിൽ വരുന്ന iPhone 17 Air ആയിരിക്കും. ഇത് വിപണിയിലെ ഏറ്റവും കനം കുറഞ്ഞ ഫോണായി മാറുമെന്നാണ് കിംവദന്തികൾ. പുതിയ തലമുറ എഐ ഫീച്ചറുകൾ ഉൾക്കൊള്ളുന്ന ‘Apple Intelligence’ ഈ ഇവന്റിലെ പ്രധാന പ്രഖ്യാപനമായിരിക്കും. ഈ ഫീച്ചർ iPhone 17 സീരീസിനും തിരഞ്ഞെടുത്ത പഴയ മോഡലുകളായ iPhone 15 Pro, iPhone 16 സീരീസ് ഫോണുകൾക്കും ലഭ്യമാകും.
റാം ശേഷിയിലും ഇത്തവണ വലിയ മാറ്റങ്ങളുണ്ടാകും. iPhone 17 Air, Pro, Pro Max മോഡലുകളിൽ 12GB റാം ഉണ്ടാകുമെന്നും ഇത് AI ഫീച്ചറുകളുടെ പ്രകടനം വർദ്ധിപ്പിക്കുമെന്നും സൂചനയുണ്ട്. അതേസമയം, അടിസ്ഥാന മോഡലായ iPhone 17-ൽ 8GB റാം തുടരും.
ആപ്പിളിന്റെ പല ബ്രാൻഡുകളുടെയും പേരിൽ ‘ഐ’; എന്താണ് ഇതിന്റെ രഹസ്യം?
വാച്ചിൽ: ആരോഗ്യസംരക്ഷണം, കൂടുതൽ ഫീച്ചറുകൾ
പുതിയ Apple Watch Series 11-ൽ രക്തസമ്മർദ്ദം നിരീക്ഷിക്കാനുള്ള സംവിധാനം ഉൾപ്പെടെയുള്ള ആരോഗ്യ ഫീച്ചറുകൾ ലഭിക്കുമെന്ന് പ്രതീക്ഷിക്കുന്നു. ഇതിനുപുറമെ, തിളക്കം കൂടിയ ഡിസ്പ്ലേ, ഉപഗ്രഹങ്ങളുമായി ബന്ധപ്പെട്ട് സന്ദേശങ്ങൾ അയക്കാനുള്ള സൗകര്യം തുടങ്ങിയവയും ഇതിൽ ഉണ്ടാകാൻ സാധ്യതയുണ്ട്.
എപ്പോൾ, എങ്ങനെ കാണാം?
ഇന്ത്യൻ സമയം രാത്രി 10:30-നാണ് ആപ്പിളിന്റെ ഇവന്റ് ആരംഭിക്കുക. Apple-ന്റെ ഔദ്യോഗിക വെബ്സൈറ്റായ apple.com-ലും കമ്പനിയുടെ YouTube ചാനലിലും തത്സമയം പരിപാടി കാണാം. പുതിയ പ്രഖ്യാപനങ്ങളെക്കുറിച്ചുള്ള തത്സമയ അപ്ഡേറ്റുകൾക്കായി മനോരമ ഓൺലൈൻ ടെക്നോളജി ചാനലിലെ ലൈവ് ബ്ലോഗ് പിന്തുടരുക!