By admin 
രാജ്യമെമ്പാടും 5ജി സേവനങ്ങൾ വ്യാപകമായിട്ടും പ്രതീക്ഷിച്ച വേഗത ഫോണിൽ ലഭിക്കുന്നില്ലെന്ന പരാതി പലർക്കുമുണ്ട്. സിഗ്നൽ ബാർ ഫുൾ ആയി കാണിക്കുമെങ്കിലും വീഡിയോ ബഫർ ആകുന്നതും പേജുകൾ ലോഡ് ആകാത്തതും വല്ലാത്ത തലവേദനയാണ്. പലപ്പോഴും മൊബൈൽ നെറ്റ്വർക്കിന്റെ പ്രശ്നത്തേക്കാൾ ഉപരി, നമ്മുടെ ഫോണിലെ ചില ക്രമീകരണങ്ങളിലെ (Settings) പിഴവാകാം ഇതിന് കാരണം. ഇന്റർനെറ്റ് വേഗത വർദ്ധിപ്പിക്കാൻ ഫോണിൽ ശ്രദ്ധിക്കേണ്ട ചില കാര്യങ്ങൾ ഇതാ.
കോൾ വിളിക്കാൻ സമയം തീരുമാനിക്കാൻ വാട്സാപ്പിൽ ഷെഡ്യൂളിങ് ഫീച്ചർ, ഉപയോഗിക്കേണ്ടത് ഇങ്ങനെ
ആദ്യം പരിശോധിക്കേണ്ടത് ഫോണിലെ നെറ്റ്വർക്ക് മുൻഗണനയാണ്. ഫോൺ സെറ്റിങ്സിൽ ‘സിം കാർഡ് ആൻഡ് മൊബൈൽ നെറ്റ്വർക്ക്’ (SIM Card & Mobile Networks) എന്ന ഓപ്ഷൻ എടുക്കുക. ഇതിൽ ‘പ്രിഫേർഡ് നെറ്റ്വർക്ക് ടൈപ്പ്’ (Preferred Network Type) എന്നത് ‘5G/4G/3G/2G (Auto)’ എന്ന മോഡിലാണോ എന്ന് ഉറപ്പുവരുത്തുക. ചിലപ്പോൾ ഇത് ‘LTE Only’ അല്ലെങ്കിൽ ‘4G’ എന്നതിലായിരിക്കും സെറ്റ് ചെയ്തിട്ടുണ്ടാവുക. അങ്ങനെയാണെങ്കിൽ 5ജി കവറേജ് ഉള്ള സ്ഥലത്താണെങ്കിൽ പോലും നിങ്ങൾക്ക് 5ജി വേഗത ലഭിക്കില്ല.
അക്കൗണ്ടിൽനിന്നും പണം പോകുന്നു, കാരണം മനസിലാകുന്നില്ല! പരിഭ്രമിക്കേണ്ട ഇതൊന്ന് പരിശോധിക്കാം
‘ഡാറ്റ സേവർ’ (Data Saver) അല്ലെങ്കിൽ ‘ലോ ഡാറ്റ മോഡ്’ (Low Data Mode) ഓൺ ചെയ്ത് വെച്ചിട്ടുണ്ടോ എന്ന് പരിശോധിക്കുകയാണ് അടുത്ത പടി. ഡാറ്റ ലാഭിക്കാൻ ഇത് സഹായിക്കുമെങ്കിലും ഇന്റർനെറ്റ് വേഗത ഗണ്യമായി കുറയ്ക്കാൻ ഇത് കാരണമാകും. വേഗതയാണ് നിങ്ങൾക്ക് പ്രധാനമെങ്കിൽ ഈ ഓപ്ഷൻ ഓഫ് ചെയ്ത് വെക്കുന്നതാണ് ഉചിതം. കൂടാതെ ബാക്ക്ഗ്രൗണ്ടിൽ പ്രവർത്തിക്കുന്ന അനാവശ്യ ആപ്പുകൾ ക്ലോസ് ചെയ്യുന്നതും, ഓട്ടോമാറ്റിക് ആപ്പ് അപ്ഡേറ്റുകൾ വൈഫൈയിലേക്ക് മാത്രമായി പരിമിതപ്പെടുത്തുന്നതും മൊബൈൽ ഡാറ്റയുടെ വേഗത കൂടാൻ സഹായിക്കും.
ഇത്രയും ചെയ്തിട്ടും സ്പീഡ് കൂടുന്നില്ല
‘എപിഎൻ’ (APN – Access Point Names) സെറ്റിങ്സ് റീസെറ്റ് ചെയ്തു നോക്കാവുന്നതാണ്. നെറ്റ്വർക്ക് സെറ്റിങ്സിൽ തന്നെ ഇതിനുള്ള ഓപ്ഷൻ ലഭ്യമാണ്. ഇതിനായി ‘Reset to default’ നൽകിയാൽ മതിയാകും. ഫോൺ ഇടയ്ക്കിടെ ‘റീസ്റ്റാർട്ട്’ (Restart) ചെയ്യുന്നതോ അല്ലെങ്കിൽ ‘ഫ്ളൈറ്റ് മോഡ്’ (Flight Mode) ഓൺ ചെയ്ത് ഓഫ് ചെയ്യുന്നതോ നെറ്റ്വർക്ക് റിഫ്രഷ് ആകാനും സിഗ്നൽ ശക്തിപ്പെടാനും സഹായിക്കുന്ന എളുപ്പവഴികളാണ്.