By admin 
നിങ്ങൾ ഈ വാർത്ത വായിക്കുന്ന സ്മാർട്ഫോൺ, ഓടിക്കാൻ ആഗ്രഹിക്കുന്ന ഇലക്ട്രിക് കാർ, കൂറ്റൻ കാറ്റാടി യന്ത്രം, രാജ്യത്തിന്റെ സുരക്ഷ ഉറപ്പാക്കുന്ന മിസൈലുകൾ തുടങ്ങിയവയെല്ലാമടങ്ങുന്ന ഈ ഹൈടെക് ലോകത്തെ മുന്നോട്ടു നയിക്കുന്ന ഒരു പൊതു ഘടകമുണ്ട്– ദുർലഭ ഭൗമ ധാതുക്കൾ (Rare Earth Minerals). ഇവ എന്താണെന്നും എന്തുകൊണ്ടാണ് ഇവയുടെ ലഭ്യത ലോക രാഷ്ട്രീയത്തിലെ ഏറ്റവും വലിയ തന്ത്രപരമായ വിഷയമായി മാറിയതെന്നും പരിശോധിക്കാം.
എന്താണ് ‘ദുർലഭ ഭൗമ’ മൂലകങ്ങൾ?
പീരിയോഡിക് ടേബിളിലെ 17 രാസ മൂലകങ്ങളുടെ ഒരു കൂട്ടമാണ് ‘ദുർലഭ ഭൗമ മൂലകങ്ങൾ’. ഇതിൽ ലാന്തനൈഡ് ശ്രേണിയിലെ 15 മൂലകങ്ങളും സ്കാൻഡിയം, യിട്രിയം എന്നിവയും ഉൾപ്പെടുന്നു. ദുർലഭം എന്നു കേട്ട് ഇവ ഭൂമിയിൽ വളരെ കുറവാണെന്നു ധരിക്കരുത്. ഇവയുടെ സാന്ദ്രത കുറവായതിനാലും മറ്റു ധാതുക്കളുമായി ചേർന്നു ചിതറിപ്പോയ നിലയിൽ കാണുന്നതിനാലുമാണ് ഇവയെ വേർതിരിച്ചെടുക്കാൻ പ്രയാസമുള്ളത്. അതായത്, ഖനനം ചെയ്തെടുക്കാനുള്ള പ്രയാസം കൊണ്ടാണ് ഇവയ്ക്ക് ‘ദുർലഭം’ എന്ന പേര് ലഭിച്ചത്.
സൂപ്പർ പവറുകൾക്കു പിന്നിലെ രഹസ്യം
ഈ ധാതുക്കളുടെ ഏറ്റവും വലിയ പ്രത്യേകത അതിന്റെ സവിശേഷ ഗുണങ്ങളാണ്:
∙ നിയോഡൈമിയം, ഡിസ്പ്രോസിയം തുടങ്ങിയവ ഉപയോഗിച്ചു നിർമിക്കുന്ന കാന്തങ്ങൾ ഭാരം കുറഞ്ഞതും അതീവ ശക്തിയുള്ളതുമാണ്. ഇവയാണ് ഇലക്ട്രിക് കാറുകളുടെ മോട്ടറുകൾ, കാറ്റാടി യന്ത്രത്തിന്റെ ജനറേറ്ററുകൾ, കംപ്യൂട്ടർ ഹാർഡ് ഡ്രൈവുകൾ എന്നിവയുടെയെല്ലാം നെടുംതൂൺ.
∙ യൂറോപ്പിയം, യിട്രിയം പോലുള്ളവ എൽഇഡി ലൈറ്റുകൾക്കും ഫ്ലാറ്റ് സ്ക്രീൻ ഡിസ്പ്ലേകൾക്കും ആവശ്യമായ കൃത്യമായ വർണങ്ങളും പ്രകാശവും നൽകുന്നു.
ഓടുന്ന കാറിന്റെ ബോണറ്റിനുള്ളിൽ പൂച്ച; പോറലേൽക്കാതെ സഞ്ചരിച്ചത് കിലോമീറ്ററുകളോളം, പുതുജീവൻ
∙ സീറിയം പോലുള്ളവ പെട്രോളിയം ശുദ്ധീകരണ പ്രക്രിയകളിലും വാഹനങ്ങളുടെ കാറ്റലറ്റിക് കൺവെർട്ടറുകളിലും (പരിസ്ഥിതി മലിനീകരണം കുറയ്ക്കാൻ) അനിവാര്യമാണ്.
ചുരുക്കത്തിൽ, ഈ ലോകത്തിനും ഇവിടുത്തെ ജീവിതത്തിനും കൂടുതൽ വേഗവും കാര്യക്ഷമതയും പകരുന്ന, ഇതിനെ കൂടുതൽ ഹരിതാഭമാക്കുന്ന ഓരോ സാങ്കേതികവിദ്യയിലും ഈ ധാതുക്കൾക്കു നിർണായക പങ്കുണ്ട്.
ചൈനീസ് ആധിപത്യം
ഈ ധാതുക്കളുടെ പ്രാധാന്യം പോലെ തന്നെ സങ്കീർണമാണ് ഇവയുടെ ആഗോള വിതരണ ശൃംഖല. ദുർലഭ ഭൗമ മൂലകങ്ങളുടെ ഖനനത്തിലും ശുദ്ധീകരണത്തിലും ചൈനയ്ക്കാണ് ആധിപത്യം. ഇവ വേർതിരിച്ചെടുക്കുന്ന പ്രക്രിയകൾ പരിസ്ഥിതിക്കു ദോഷകരമായ മാലിന്യങ്ങൾ പുറത്തുവിടുന്നതിനാൽ, പാശ്ചാത്യ രാജ്യങ്ങൾ ഉൾപ്പെടെ പലരും ഈ ശുദ്ധീകരണശാലകൾ സ്ഥാപിക്കാൻ മടിച്ചിരുന്നു. ഈ സാഹചര്യം ചൈന മുതലെടുത്തു. ഏറ്റവും ശക്തമായ കാന്തങ്ങൾ നിർമിക്കാൻ ആവശ്യമായ ‘ഹെവി ആർഇഇ’കളുടെ ഉൽപാദനത്തിൽ ചൈനയ്ക്കുള്ള കുത്തക മറ്റു രാജ്യങ്ങൾക്ക് വെല്ലുവിളിയാണ്. ഒരു രാജ്യം ഈ നിർണായക ധാതുക്കളുടെ കയറ്റുമതിയിൽ നിയന്ത്രണം ഏർപ്പെടുത്തിയാൽ, അതു ലോകമെമ്പാടുമുള്ള ഇലക്ട്രോണിക്സ്, പ്രതിരോധം, പുനരുപയോഗ ഊർജം എന്നീ വ്യവസായങ്ങളെ സ്തംഭിപ്പിക്കാൻ പോന്നത്ര ശക്തമാണ്.
ഇന്ത്യയും മുന്നോട്ട്
ഇന്ത്യൻ തീരങ്ങളിലെ മണലിൽ മോണസൈറ്റ് പോലുള്ള ദുർലഭ ധാതുക്കളുടെ നിക്ഷേപമുണ്ട്. എങ്കിലും ശുദ്ധീകരണത്തിലും വിവിധ ഉൽപന്നങ്ങളുടെ നിർമാണത്തിലും നമ്മുടെ രാജ്യം ഇപ്പോഴും പിന്നിലാണ്. ഹരിത ഊർജ ലക്ഷ്യങ്ങൾ കൈവരിക്കുന്നതിനും പ്രതിരോധ മേഖലയിലെ സ്വയംപര്യാപ്തതയ്ക്കും വേണ്ടി, ഇറക്കുമതിയെ ആശ്രയിക്കുന്നതു കുറയ്ക്കാൻ ഇന്ത്യയും സ്വന്തമായി ഖനന, ശുദ്ധീകരണ സൗകര്യങ്ങൾ വികസിപ്പിക്കാനുള്ള നീക്കങ്ങൾ സജീവമാക്കിയിട്ടുണ്ട്.
ഇന്നത്തെ ഹൈടെക് ലോകത്തിന്റെ അദൃശ്യമായ അടിത്തറയാണ് ദുർലഭ ഭൗമ ധാതുക്കൾ. ഇവയുടെ ലഭ്യതയും നിയന്ത്രണവും ഇനി മുതൽ സാമ്പത്തിക ശക്തിയെ മാത്രമല്ല, ഒരു രാജ്യത്തിന്റെ തന്ത്രപരമായ സുരക്ഷിതത്വത്തെയും നിർണയിക്കും. അതുകൊണ്ടുതന്നെ, ഇവയുടെ ലഭ്യത ഉറപ്പാക്കാൻ പുതിയ ഖനന കേന്ദ്രങ്ങൾ കണ്ടെത്തുക, സാങ്കേതികവിദ്യ വികസിപ്പിക്കുക, പഴയ ഉപകരണങ്ങളിൽനിന്ന് ഇവ പുനരുപയോഗം ചെയ്യുക എന്നിവയിലെല്ലാം പല രാജ്യങ്ങളും ശ്രദ്ധവയ്ക്കുന്നുണ്ട്.