മഡുറോയെ കുടുക്കിയ ‘ക്ലോഡ്’? യുദ്ധാവശ്യത്തിന് ഉപയോഗിക്കാനാവില്ലെന്ന് ആന്ത്രോപിക്; നിരോധനവുമായി ട്രംപ്, എഐ കമ്പനികളിൽ ആശങ്ക

വെനസ്വേലൻ മുൻ പ്രസിഡന്റ് നിക്കോളാസ് മഡുറോയെ പിടികൂടാനുള്ള അതിസാഹസികമായ സൈനിക നീക്കത്തിൽ ആർട്ടിഫിഷ്യൽ ഇന്റലിജൻസ്ഉപയോഗിച്ചെന്ന വെളിപ്പെടുത്തൽ ആഗോളതലത്തിൽ ചർച്ചയാകുന്നു. വാൾ സ്ട്രീറ്റ് ജേണൽ റിപ്പോർട് പ്രകാരം, കാരക്കാസിൽ നടന്ന നിർണായക ഓപ്പറേഷനിൽ പെന്റഗൺ അത്യാധുനിക എഐ സാങ്കേതികവിദ്യയുടെ സഹായം തേടിയിരുന്നു. ഇതിന് പിന്നാലെയാണ് പ്രമുഖ എഐ സ്റ്റാർട്ടപ്പായ ആന്ത്രോപിക്കിനെ നിരോധിച്ചുകൊണ്ടുള്ള പ്രസിഡന്റ് ഡൊണാൾഡ് ട്രംപിന്റെ നാടകീയ ഉത്തരവ് പുറത്തുവരുന്നത്.

മഡുറോ ഓപ്പറേഷനും എഐയും

വിവിധ സൈനിക കേന്ദ്രങ്ങളിൽ ബോംബാക്രമണം നടത്തിയ ശേഷമാണ് മഡുറോയെയും ഭാര്യയെയും യുഎസ് സേന കസ്റ്റഡിയിലെടുത്തത്. ഈ നീക്കത്തിൽ ആന്ത്രോപിക്കിന്റെ ‘ക്ലോഡ്’ (Claude) എന്ന എഐ മോഡൽ ഭാഗമായെന്നാണ് സൂചനകൾ. എന്നാൽ, തങ്ങളുടെ എഐ ടൂളുകൾ ആയുധ നിർമ്മാണത്തിനോ, അക്രമങ്ങൾ പ്രോത്സാഹിപ്പിക്കുന്നതിനോ, നിരീക്ഷണത്തിനോ ഉപയോഗിക്കരുത് എന്ന കർശനമായ ധാർമ്മിക നയമാണ് ആന്ത്രോപിക് മുന്നോട്ടുവെച്ചിരുന്നത്. കമ്പനിയുടെ ഈ ‘സിലിക്കൺ വാലി പ്രത്യയശാസ്ത്രം’ അമേരിക്കൻ സൈനിക താൽപ്പര്യങ്ങൾക്ക് വിഘാതമാകുന്നു എന്ന വിലയിരുത്തലിലാണ് പെന്റഗൺ.

ട്രംപിന്റെ കടുത്ത നടപടി

ADVERTISEMENT

ആന്ത്രോപിക്കിന്റെ സാങ്കേതികവിദ്യ ഉപയോഗിക്കുന്നത് അടിയന്തിരമായി നിർത്താൻ എല്ലാ ഫെഡറൽ ഏജൻസികൾക്കും പ്രസിഡന്റ് ട്രംപ് ഉത്തരവ് നൽകി. ആറ് മാസത്തിനകം സൈനിക-രഹസ്യാന്വേഷണ വിഭാഗങ്ങളിൽ നിന്ന് കമ്പനിയുടെ ടൂളുകൾ പൂർണ്ണമായും ഒഴിവാക്കണം. ഇതിന് പിന്നാലെ പ്രതിരോധ സെക്രട്ടറി പീറ്റ് ഹെഗ്‌സെത്ത് ആന്ത്രോപിക്കിനെ “ദേശീയ സുരക്ഷാ ഭീഷണി” (Supply Chain Risk) ആയി പ്രഖ്യാപിച്ചു. ചൈനീസ് കമ്പനിയായ വാവേയ്ക്ക് സമാനമായ വിലക്കാണ് ഇപ്പോൾ ആന്ത്രോപിക്കിന് മേൽ ചുമത്തിയിരിക്കുന്നത്.

വിവാദമായ ‘അൺറെസ്ട്രിക്റ്റഡ് ആക്സസ്’

ക്ലോഡ് എഐ മോഡലിന് മേൽ പെന്റഗണിന് പൂർണ്ണവും നിയന്ത്രണമില്ലാത്തതുമായ അധികാരം വേണമെന്ന പീറ്റ് ഹെഗ്‌സെത്തിന്റെ ആവശ്യം കമ്പനി സിഇഓ ഡാരിയോ അമോഡി നിരസിച്ചതാണ് തർക്കം രൂക്ഷമാക്കിയത്.

കമ്പനിയുടെ നിലപാട്: എഐ ഉപയോഗിച്ചുള്ള കൂട്ടനിരീക്ഷണമോ മനുഷ്യ ഇടപെടലില്ലാത്ത കൊലയാളി ആയുധങ്ങളോ (Autonomous Weapons) തങ്ങളുടെ ലക്ഷ്യമല്ല.

ADVERTISEMENT

പെന്റഗണിന്റെ നിലപാട്: യുദ്ധഭൂമിയിലെ നേരിട്ടുള്ള തീരുമാനങ്ങൾക്കായി എഐ ഉപയോഗിക്കണം. സൈനിക അഡ്മിനിസ്ട്രേഷനായി മാത്രം ഉപയോഗിക്കുന്ന എഐ മോഡലുകളുമായി സഹകരിക്കില്ലെന്ന് ഹെഗ്‌സെത്ത് വ്യക്തമാക്കിയിരുന്നു.

200 മില്യൺ ഡോളറിന്റെ കരാർ റദ്ദാക്കി

അന്ത്യശാസനം ലംഘിച്ചതോടെ ആന്ത്രോപിക്കിന് നൽകിയിരുന്ന 200 മില്യൺ ഡോളറിന്റെ സർക്കാർ കരാർ റദ്ദാക്കി. യുഎസ് സൈന്യവുമായി ബന്ധമുള്ള ഒരു കമ്പനിയും ആന്ത്രോപിക്കുമായി സഹകരിക്കരുതെന്നും നിർദ്ദേശമുണ്ട്. അമേരിക്കൻ സൈനിക നീക്കങ്ങളിൽ എഐയുടെ പങ്കാളിത്തം വർദ്ധിപ്പിക്കാൻ ലക്ഷ്യമിട്ടുള്ള ട്രംപ് ഭരണകൂടത്തിന്റെ നീക്കത്തിൽ ആദ്യത്തെ ഇരയായിരിക്കുകയാണ് ആന്ത്രോപിക്.

സാങ്കേതിക വിദ്യയുടെ ധാർമ്മികതയും രാജ്യസുരക്ഷയും തമ്മിലുള്ള ഈ പോരാട്ടം സിലിക്കൺ വാലിയിലെ മറ്റ് എഐ കമ്പനികളെയും ആശങ്കയിലാഴ്ത്തിയിട്ടുണ്ട്. വരും ദിവസങ്ങളിൽ കൂടുതൽ എഐ കമ്പനികൾക്ക് നേരെ സമാനമായ സമ്മർദ്ദം ഉണ്ടാകുമെന്നാണ് സൂചന.

ADVERTISEMENT