By admin 
അടുത്ത അഞ്ച് വർഷത്തിനുള്ളിൽ കേരളം കൈവരിക്കേണ്ട സാങ്കേതിക വളർച്ചയുടെ സമഗ്രമായ രൂപരേഖ തയ്യാറാക്കാൻ ലോകമെമ്പാടുമുള്ള ടെക് വിദഗ്ധർ കൊച്ചിയിലെത്തുന്നു. മനോരമ ഓൺലൈൻ സംഘടിപ്പിക്കുന്ന ഡിജിറ്റൽ കോൺക്ലേവ് ‘ടെക്സ്പെക്റ്റേഷൻസ് 2026’ ഫെബ്രുവരി 27-ന് കൊച്ചിയിലെ ക്രൗൺ പ്ലാസയിൽ നടക്കും. ‘ക്രിസ്റ്റൽ ബോളിങ് 2030’ (Crystal Balling 2030) എന്ന പ്രമേയത്തിലാണ് പത്താം വർഷത്തിലേക്ക് കടക്കുന്ന ഈ ആഗോള ഉച്ചകോടി ഒരുങ്ങുന്നത്.
‘ജനിതക രഹസ്യം’ സൗജന്യം, ആരോഗ്യരംഗത്ത് വിപ്ലവം സൃഷ്ടിക്കാൻ ‘ചിരഞ്ജീവ്’; ഹേമന്ത് ജയിൻ ടെക്സ്പെക്റ്റേഷൻസിൽ
2016-ൽ ആരംഭിച്ച ടെക്സ്പെക്റ്റേഷൻസ് ഇന്ന് കേരളത്തിലെ ഏറ്റവും വലിയ ടെക് കോൺക്ലേവുകളിൽ ഒന്നാണ്. കേവലം ചർച്ചകൾക്കപ്പുറം, ആർട്ടിഫിഷ്യൽ ഇന്റലിജൻസ് (AI), ഹെൽത്ത് ടെക്, വിനോദ മേഖലയിലെ മാറ്റങ്ങൾ, സ്റ്റാർട്ടപ്പ് നിക്ഷേപം തുടങ്ങിയവയിൽ പ്രായോഗികമായ കർമ്മപദ്ധതികൾ രൂപീകരിക്കുകയാണ് ലക്ഷ്യം. സാങ്കേതികവിദ്യ സമൂഹത്തിലും സമ്പദ്വ്യവസ്ഥയിലും വരുത്തുന്ന മാറ്റങ്ങളെ മുൻകൂട്ടി കാണാനും അതിനനുസരിച്ച് നയങ്ങൾ രൂപീകരിക്കാനും ഈ വേദി വലിയ രീതിയിൽ സഹായിക്കുന്നു.
ഉച്ചകോടിയുടെ ആദ്യ പകുതിയിൽ ക്ലൗഡ് കമ്പ്യൂട്ടിംഗും സ്റ്റാർട്ടപ്പ് നിക്ഷേപവുമാണ് പ്രധാനമായും ചർച്ച ചെയ്യപ്പെടുന്നത്. ഉദ്ഘാടന ചടങ്ങിന് പിന്നാലെ ആമസോൺ വെബ് സർവീസസ് (AWS) ഇന്ത്യ-സൗത്ത് ഏഷ്യ പ്രസിഡന്റ് സന്ദീപ് ദത്ത മുഖ്യപ്രഭാഷണം നടത്തും. തുടർന്ന് നടക്കുന്ന പാനൽ ചർച്ചകളിൽ കെഎസ് യുഎം സിഇഒ അനൂപ് അംബിക, ആശിഷ് അഗർവാൾ (GIC), അനുരാജ് എന്നൈ (InfinyAI Labs), അഭിജിത്ത് എം, ഫെലിക്സ് ജോസ്മോൻ എന്നിവർ നിക്ഷേപ സാധ്യതകളെക്കുറിച്ച് സംസാരിക്കും. ഒപ്പം സ്റ്റാർട്ടപ്പ് മാസ്റ്റർ ക്ലാസുകളും ഹെൽത്ത് ടെക് മേഖലയിലെ മാറ്റങ്ങളെക്കുറിച്ചുള്ള വിശകലനങ്ങളും അരങ്ങേറും.
ADVERTISEMENT
വിനോദസഞ്ചാര മേഖലയിലെ മാറ്റങ്ങളും
ഉച്ചയ്ക്ക് ശേഷമുള്ള സെഷനുകളിൽ മാധ്യമരംഗത്തെയും വിനോദസഞ്ചാര മേഖലയിലെയും പുതിയ പ്രവണതകൾ ചർച്ചയാകും. പ്രമുഖ മാധ്യമപ്രവർത്തക ഫയാ ഡിസൂസയും സോഷ്യൽ മീഡിയ താരം ഡോ. അനിൽ എബ്രഹാമും തമ്മിലുള്ള സംവാദം വാർത്താ വിനിമയ രംഗത്തെ മാറ്റങ്ങളെ തൊട്ടുണർത്തുന്നതാകും. തുടർന്ന് ടെക് മഹിന്ദ്ര സിഒഒ അതുൽ സോനേജ, ടാലി സൊല്യൂഷൻസ് എംഡി തേജസ് ഗോയങ്ക, അഡോബി വൈസ് പ്രസിഡന്റ് മൻമീത് ധോഡി എന്നിവർ സാങ്കേതിക വിദ്യയുടെ ഭാവി സാധ്യതകൾ പങ്കുവെക്കും. സിനിമാ താരങ്ങളായ ജയസൂര്യ, നവ്യ നായർ, സംവിധായകൻ ഡിൻജിത്ത് അയ്യത്താൻ എന്നിവർ പങ്കെടുക്കുന്ന സെഷനിൽ സിനിമയും താരങ്ങളും സ്ക്രീനുകളും 2030-ലേക്ക് എത്തുമ്പോൾ എങ്ങനെയെല്ലാം മാറുമെന്ന ചർച്ചയും നടക്കും.
സ്റ്റെതസ്കോപ്പും മൈക്കും ഒരുപോലെ വഴങ്ങുന്ന ഡോക്ടർ; ഡോ. അനിൽ എബ്രഹാം ‘ടെക്സ്പെക്റ്റേഷൻസ് 2026’ ലേക്ക്
സോഫ്റ്റ്വെയർ രംഗത്തെ ആഗോള മാറ്റങ്ങളും ഇന്ത്യൻ ഇക്കോസിസ്റ്റത്തിന്റെ വളർച്ചയും ഉച്ചകോടിയുടെ പ്രധാന ആകർഷണമാണ്. അഡോബി, ടെക് മഹിന്ദ്ര, ഒമ്നിക്കോം അഡ്വർടൈസിംഗ് തുടങ്ങി മുൻനിര കമ്പനികളുടെ പ്രതിനിധികൾ പങ്കെടുക്കുന്ന സെഷനുകൾ സോഫ്റ്റ്വെയർ സർവീസസ് രംഗത്തെ പുതിയ രീതികളെക്കുറിച്ച് അവബോധം നൽകും. ഇതിനൊപ്പം റീട്ടെയിൽ, കൊമേഴ്സ് രംഗത്തെ ആർട്ടിഫിഷ്യൽ ഇന്റലിജൻസിന്റെ പ്രയോഗങ്ങളെക്കുറിച്ചും വിദഗ്ധർ സംസാരിക്കും.
ADVERTISEMENT
സാധ്യതകൾ തേടാൻ നെറ്റ്വർക്കിങ് ലോഞ്ചുകൾ
സ്റ്റാർട്ടപ്പ് സ്ഥാപകർ, നിക്ഷേപകർ, സോഫ്റ്റ്വെയർ ഡവലപ്പർമാർ, നയരൂപകർത്താക്കൾ, വിദ്യാർഥികൾ, ടെക്നോക്രാറ്റുകൾ തുടങ്ങി സാങ്കേതിക മേഖലയിൽ താൽപ്പര്യമുള്ള ഏവർക്കും ഈ പ്ലാറ്റ്ഫോം പ്രയോജനപ്പെടുത്താം. വൈവിധ്യമാർന്ന വിഷയങ്ങളിൽ അറിവ് പങ്കുവെക്കുന്നതിനൊപ്പം പുതിയ ആശയങ്ങൾ അവതരിപ്പിക്കാനുള്ള വേദി കൂടിയായി ടെക്സ്പെക്റ്റേഷൻസ് മാറുന്നു. നെറ്റ്വർക്കിങ് ലോഞ്ചുകൾ ഉൾപ്പെടെയുള്ള സൗകര്യങ്ങളും ഉച്ചകോടിയുടെ ഭാഗമായി ക്രമീകരിച്ചിട്ടുണ്ട്.
What you should read next
കേരളത്തിലെ ഏറ്റവും വലിയ ഡിജിറ്റൽ സംഗമം; ടെക്സ്പെക്റ്റേഷൻസ് 2026 കൊച്ചിയിൽ, റജിസ്റ്റർ ചെയ്യാം
റജിസ്ട്രേഷനും കൂടുതൽ വിവരങ്ങൾക്കും www.techspectations.com സന്ദർശിക്കുക. കേരളത്തിന്റെ ഡിജിറ്റൽ കുതിപ്പിന് കരുത്തുപകരുന്ന ഈ പ്ലാറ്റ്ഫോമിൽ സാങ്കേതിക ലോകത്തെ പ്രമുഖരുമായി സംവദിക്കാൻ ഏവർക്കും അവസരമുണ്ടാകും.
ADVERTISEMENT