വാട്സ്ആപ്പ് സ്റ്റാറ്റസിൽ അടിമുടി മാറ്റം; വരുന്നതു ഇൻസ്റ്റഗ്രാമിലെ ജനപ്രിയ ഫീച്ചറുകൾ

ഇൻസ്റ്റാഗ്രാം സ്റ്റോറികൾക്ക് സമാനമായി സ്റ്റാറ്റസിൽ അടിമുടി മാറ്റത്തിന് ഒരുങ്ങി വാട്സ്ആപ്പ്

ഉപയോക്താക്കളുടെ മനസ്സ് അറിഞ്ഞ് വ്യത്യസ്തങ്ങളായ ഫീച്ചറുകൾ പരീക്ഷിക്കുന്ന മെസേജിങ് ആപ്ലിക്കേഷനാണ് മെറ്റയുടെ വാട്സ്ആപ്പ്. ഇൻസ്റ്റാഗ്രാം സ്റ്റോറികൾക്ക് സമാനമായി, സ്റ്റാറ്റസിൽ അടിമുടി മാറ്റത്തിന് ഒരുങ്ങുകയാണ് വാട്സ്ആപ്പ് ഇപ്പോൾ.

വാട്സ്ആപ്പ് സ്റ്റാറ്റസുകളിൽ മെൻഷൻ ചെയ്യാനും, സ്റ്റാറ്റസുകള്‍ ലൈക്ക് ചെയ്യാനും, മെന്‍ഷന്‍ സ്വകാര്യമാക്കാനും സാധിക്കുന്ന ഫീച്ചറുകൾ ഉൾപ്പെടെയുള്ള ഒരുപിടി പുതിയ മാറ്റങ്ങളാണ് വാട്സ്ആപ്പ് അവതരിപ്പിക്കുന്നത്. മെൻഷൻ സാധ്യമാകുന്നതോടെ മറ്റുള്ളവർക്ക് സ്റ്റാറ്റസ് റീപോസ്റ്റ് ചെയ്യാനും അവസരമൊരുങ്ങും.

സിംഗിൾ ടാപ്പിലൂടെ സ്റ്റാറ്റസുകൾ ലൈക്കു ചെയ്യാൻ അനുവദിക്കുന്ന മറ്റൊരു രസകരമായ ഫീച്ചറും വാട്സ്ആപ്പ് പരീക്ഷിക്കുന്നുണ്ട്. ഇൻസ്റ്റാഗ്രാം ഹാർട്ട് ബട്ടണിനു സമാനമായാകും ഫീച്ചർ പ്രവർത്തിക്കുക. അതേസമയം, ലൈക്കുകളുടെ എണ്ണം മറ്റുള്ളവർക്ക് കാണാനാകില്ല.

നിലവിൽ സ്റ്റാറ്റസിൽ മെൻഷൻ ചെയ്യാവുന്ന ഉപയോക്താക്കളുടെ എണ്ണം 5 ആയി പരിമിതപ്പെടുത്തിയിരിക്കുന്നു. മറ്റൊരാളുടെ പേരു പരാമർശിക്കാതെ ടാഗു ചെയ്യാനും ഫീച്ചറിലൂടെ സാധിക്കുന്നു. ഇതിനുപുറമേ, നിങ്ങളുടെ സ്റ്റാറ്റസിൽ മറ്റാരെയെങ്കിലും സ്വകാര്യമായി മെൻഷൻ ചെയ്യാനും, സ്റ്റാറ്റസ് അവർക്ക് വീണ്ടും ഷെയർ ചെയ്യാനും സാധിക്കും.

നിങ്ങൾ ആരെയെങ്കിലും സ്വകാര്യമായി ടാഗു ചെയ്യുകയാണെങ്കിൽ, അവരുടെ മെൻഷൻ സ്റ്റാറ്റസിൽ ദൃശ്യമാകില്ല. നോട്ടിഫിക്കേഷൻ പ്രൈവറ്റായാകും ലഭ്യമാകുക. അടുത്തിടെ, വാട്ട്‌സ്ആപ്പ് പേഴ്സണൽ, ഗ്രൂപ്പ് ചാറ്റുകൾക്കായി പുതിയ ടൈപ്പിംഗ് ഇൻഡിക്കേറ്റർ പരീക്ഷിച്ചിരുന്നു. ഇതു ചാറ്റ് സ്‌ക്രീനിനുള്ളിൽ ഒരു ചാറ്റ് ബബിളായി ദൃശ്യമാകും. പുതിയ ഫീച്ചറുകൾ വരും അപ്ഡേറ്റുകളിൽ ലഭ്യമാകുമെന്നാണ് വിവരം.

Content retrieved from: https://malayalam.indianexpress.com/tech/whatsapp-status-to-soon-get-instagram-stories-like-features-7285718.